Ásmegin sjúkraþjálfun var stofnað haustið 2008 af sjúkraþjálfurunum Axel Bragasyni, Guðlaugu Kristjánsdóttur og Kristni Magnússyni eftir nokkurra ára skraf og ráðagerðir.

Stofan er starfrækt í húsnæði hinnar nýju og glæsilegu sundmiðstöðvar á Völlunum í Hafnarfirði, í samstarfi við Ásvallalaug, Reebok Fitness heilsurækt og Sundfélag Hafnarfjarðar.

Við erum einstaklega stolt af því að starfa í fjölbreyttu umhverfi Ásvallalaugarinnar. Nálægðin við líkamsræktina hjá Reebok Fitness, sundlaugar, potta og gufubað, auk hins margbreytilega umhverfis utandyra með allra handa göngustígum, Ásfjalli og Ástjörninni, gefur lýðheilsusjónarmiðum byr undir báða vængi.

Markmið Ásmegin sjúkraþjálfunar er að veita framúrskarandi sjúkraþjálfun bæði fyrir einstaklinga og hópa, byggða á nýjustu þekkingu. Námskeiðahald er markmið út af fyrir sig, enda aðstaðan vel fallin til slíks.

Við vonumst til að umhverfið hvetji útskrifaða skjólstæðinga okkar til að halda áfram líkamsþjálfun, sem og að geta orðið viðskiptavinum sundlaugarinnar og Hress, sem og iðkendum hjá SH innan handar ef á bjátar og líkamlegir kvillar hamla virkni.

Sjúkraþjálfarar Ásmegin eru virkir í sí- og endurmenntun, Axel og Kristinn hafa um árabil starfað fyrir fræðslunefnd Félags íslenskra sjúkraþjálfara og eru því virkir gerendur í endurmenntun sjúkraþjálfara á Íslandi.

Opnunardagur Ásmegin var eftirminnilegur, enda 6. október 2008 örlagaríkur dagur í Íslandssögunni, dagurinn þegar fjármálakerfið hrundi. Við trúum því að gæfa fylgi þessum degi fyrir Ásmegin, þar sem ógæfan var upptekin annars staðar.

Verið velkomin!

Stofnendur Ásmegin sjúkraþjálfunar, Guðlaug, Axel og Kristinn,
á vígsludegi Ásvallalaugar 6. september 2008.